मुंबईकरांना विकासात थेट सहभागाची संधी; ‘पार्टिसिपेट मुंबई’ प्रकल्पाचे उद्या लोकार्पण

प्रतिनिधी, मुंबई : मुंबईच्या विकासप्रक्रियेत नागरिकांचा सहभाग अधिक व्यापक करण्याच्या उद्देशाने सुरू करण्यात येणाऱ्या ‘पार्टिसिपेट मुंबई’ प्रकल्पाचे मंगळवारी, ६ ऑक्टोबर रोजी लोकार्पण होणार आहे. मुख्यमंत्री देवेंद्र फडणवीस यांच्या प्रमुख उपस्थितीत मुंबई महापालिका मुख्यालयातील सभागृहात सकाळी ११ वाजता हा सोहळा होईल. या वेळी बृहन्मुंबई महानगरपालिका आणि समग्र संस्था यांच्यात सर्वसमावेशक करारही करण्यात येणार आहे

याशिवाय विविध राजकीय पक्षांचे गटनेते, महापालिकेच्या विविध समित्यांचे अध्यक्ष, प्रभाग समित्यांचे प्रतिनिधी आणि वरिष्ठ अधिकारी या कार्यक्रमात सहभागी होणार आहेत.
नागरिकांच्या सहभागातून मुंबईच्या विकासाला नवी दिशा?
मुंबईसारख्या महानगरात पायाभूत सुविधा, नागरी सेवा आणि स्थानिक विकासाच्या प्रश्नांवर नागरिकांचे अनुभव व सूचना महत्त्वाच्या ठरतात. ‘पार्टिसिपेट मुंबई’ प्रकल्पातून या सहभागाला संस्थात्मक स्वरूप मिळणार का, तसेच नागरिकांच्या सूचनांचे प्रत्यक्ष विकासकामांत कितपत रूपांतर होणार, हे प्रकल्पाच्या अंमलबजावणीतून स्पष्ट होईल.
महापालिका आणि समग्र संस्था यांच्यातील करारामुळे या उपक्रमाला औपचारिक चौकट मिळणार आहे. त्यामुळे केवळ प्रकल्पाचे लोकार्पण नव्हे, तर मुंबईच्या विकासप्रक्रियेत नागरिकांचा आवाज किती प्रभावीपणे पोहोचतो, याचीही या उपक्रमातून परीक्षा होणार आहे.