आगीशी दोन हात करणाऱ्या जवानांना मिळणार ‘अत्याधुनिक कवच’
प्रत्येकासाठी तब्बल ७० हजारांचा खर्च
प्रतिनिधी/मुंबई :
मुंबईत आग लागली की सर्वांत आधी धाव घेत जीव धोक्यात घालणाऱ्या अग्निशमन दलाच्या जवानांच्या सुरक्षेसाठी आता अत्याधुनिक सुरक्षा कवच उपलब्ध होणार आहे. मुंबई अग्निशमन दलातील २,१७६ अधिकारी आणि जवानांना कोट, ट्राऊजर, हुड आणि ग्लोव्हजसह अत्याधुनिक गणवेश देण्यात येणार असून, प्रत्येक गणवेशासाठी तब्बल ७० हजार रुपये खर्च केला जाणार आहे.
आगीच्या भक्ष्यस्थानी सापडलेल्या इमारती, रेल्वे अपघात, इमारत कोसळणे, झाडे उन्मळून पडणे किंवा अडकलेल्या नागरिकांची सुटका—अशा प्रत्येक आपत्कालीन मोहिमेत अग्निशमन जवान अक्षरशः मृत्यूच्या दारात जाऊन काम करतात. प्रचंड उष्णता, धुराचे लोट, विषारी वायू आणि कोसळणाऱ्या वास्तूंचा धोका पत्करत नागरिकांचे प्राण वाचविण्याची जबाबदारी त्यांच्या खांद्यावर असते.
७० हजारांचा गणवेश म्हणजे केवळ पोशाख नव्हे, सुरक्षा कवच
आगीच्या ठिकाणी काम करताना जवानांना पर्सनल प्रोटेक्टीव्ह इक्विपमेंट (PPE) वापरणे बंधनकारक आहे. आगीची तीव्रता आणि प्रचंड उष्णतेपासून जवानांच्या शरीराचे संरक्षण करण्यासाठी हे स्वसंरक्षण साहित्य महत्त्वाचे ठरते.
नव्या गणवेशात कोट, ट्राऊजर, हुड आणि ग्लोव्हज यांचा समावेश असेल. त्यामुळे आगीच्या ठिकाणी प्रत्यक्ष बचावकार्य करणाऱ्या जवानांना अधिक सुरक्षिततेसह काम करता येणार आहे.
भारतामध्ये स्वतंत्र मानकच नाही!
विशेष म्हणजे अग्निशमन दलासाठी वापरल्या जाणाऱ्या अशा स्वसंरक्षण गणवेशासाठी भारतामध्ये स्वतंत्र मानक उपलब्ध नसल्याने मुंबई अग्निशमन दलाला यापूर्वी परदेशी मानकांचा आधार घ्यावा लागला होता.
२००९-१० आणि २०१७-१८ या कालावधीत युरोपीय देशांमध्ये वापरल्या जाणाऱ्या मानकांनुसार सुरक्षा गणवेशाची खरेदी करण्यात आली होती. आता बदलत्या गरजा आणि अत्याधुनिक सुरक्षा निकष लक्षात घेऊन पुन्हा नव्या गणवेशाची खरेदी केली जाणार आहे.
अमी एंटरप्राइजकडून होणार खरेदी
अग्निशमन दलातील अधिकारी आणि जवानांसाठी नव्याने सुरक्षा गणवेश खरेदी करण्याचा प्रस्ताव प्रशासनाने पुढे आणला आहे. या खरेदीसाठी अमी एंटरप्राइज या कंपनीची निवड करण्यात आली आहे.
मुंबईच्या नागरिकांना आगीपासून वाचविण्यासाठी स्वतःचा जीव धोक्यात घालणाऱ्या जवानांच्या सुरक्षेवर आता महापालिका भर देत आहे. जवानांचा जीव सुरक्षित राहिला, तरच बचावकार्य अधिक प्रभावीपणे पार पडू शकते, या भूमिकेतून अत्याधुनिक सुरक्षा गणवेशाकडे पाहिले जात आहे.
