महिला बचत गटांच्या राख्यांना मुंबईकरांची पसंती मिळणार; दिव्यांग विद्यार्थ्यांच्या कलाकृतीही विक्रीसाठी

प्रतिनिधी/ मुंबई :

रक्षाबंधनाच्या पार्श्वभूमीवर महिला बचत गटांच्या उत्पादनांना हक्काची बाजारपेठ मिळवून देतानाच त्यांच्या कौशल्याला आणि आर्थिक स्वावलंबनाला चालना देण्यासाठी बृहन्मुंबई महानगरपालिकेच्या वतीने विशेष राखी प्रदर्शन-विक्रीचे आयोजन करण्यात आले आहे. महिला व बाल कल्याण समितीच्या अध्यक्षा श्रीमती मीनल तुर्डे यांच्या संकल्पनेतून हा उपक्रम राबविण्यात येत असून, महानगरपालिकेच्या नियोजन विभागामार्फत त्याची अंमलबजावणी केली जात आहे.
महानगरपालिकेच्या सर्व प्रशासकीय विभाग कार्यालयांमध्ये २४ आणि २५ ऑगस्ट २०२६ रोजी सकाळी १० ते सायंकाळी ६ या वेळेत प्रदर्शन-विक्री भरविण्यात येणार आहे. तर महानगरपालिका मुख्यालयात २४ ऑगस्ट रोजी याच वेळेत विशेष स्टॉल उभारण्यात येणार आहे.
हातांनी घडवलेल्या राख्यांसह घरगुती वस्तूंचीही विक्री
या प्रदर्शनात महिला बचत गटांनी स्वतःच्या हाताने तयार केलेल्या विविध आकर्षक व पर्यावरणपूरक राख्या, घरगुती खाद्यपदार्थ, शोभिवंत वस्तू तसेच विविध हस्तकला साहित्य नागरिकांना खरेदीसाठी उपलब्ध करून देण्यात येणार आहे.
महिला बचत गटांच्या उत्पादनांना थेट ग्राहकांपर्यंत पोहोचवून त्यांना बाजारपेठ उपलब्ध करून देणे, त्यांच्या मेहनतीला योग्य मोबदला मिळवून देणे आणि महिलांना आर्थिकदृष्ट्या अधिक सक्षम करण्याच्या उद्देशाने हा उपक्रम महत्त्वपूर्ण ठरणार आहे.
दिव्यांग विद्यार्थ्यांच्या सर्जनशीलतेलाही व्यासपीठ
या प्रदर्शनाचे आणखी एक विशेष आकर्षण म्हणजे महानगरपालिकेच्या विशेष शाळांमधील दिव्यांग विद्यार्थ्यांनी स्वहस्ते तयार केलेल्या आकर्षक आणि नाविन्यपूर्ण राख्या.
या विद्यार्थ्यांनी कल्पकतेने साकारलेल्या राख्यांना प्रदर्शन-विक्रीत स्थान देण्यात आले आहे. त्यांच्या कलागुणांना प्रोत्साहन मिळावे, सर्जनशीलतेला वाव मिळावा आणि आत्मविश्वासाला बळ मिळावे, या उद्देशाने हा उपक्रम राबविण्यात येत आहे.
‘राखी’सोबत आत्मनिर्भरतेलाही बळ
यंदाच्या रक्षाबंधनात बहिणीच्या हातची राखी भावाच्या मनगटावर बांधण्याबरोबरच महिला बचत गटांच्या मेहनतीला आणि दिव्यांग विद्यार्थ्यांच्या सर्जनशीलतेला साथ देण्याची संधी मुंबईकरांना मिळणार आहे. त्यामुळे या प्रदर्शनातून केवळ राखीची खरेदी नव्हे, तर स्थानिक कौशल्य, महिला स्वावलंबन आणि दिव्यांग विद्यार्थ्यांच्या कलागुणांना प्रोत्साहन देण्याचा संदेशही दिला जाणार आहे.
मुंबईकरांना आवर्जून भेट देण्याचे आवाहन
महिला बचत गटांच्या उत्पादनांना बाजारपेठ उपलब्ध करून देणे आणि दिव्यांग विद्यार्थ्यांच्या कलागुणांना प्रोत्साहन देण्यासाठी आयोजित या विशेष प्रदर्शनाला मुंबईकरांनी आवर्जून भेट द्यावी, असे आवाहन बृहन्मुंबई महानगरपालिकेच्या वतीने करण्यात आले आहे.
नागरिकांनी आपल्या जवळच्या महानगरपालिका विभाग कार्यालयात २४ व २५ ऑगस्ट रोजी, तसेच महानगरपालिका मुख्यालयातील २४ ऑगस्टच्या विशेष प्रदर्शनाला भेट देऊन महिला बचत गट व दिव्यांग विद्यार्थ्यांनी तयार केलेल्या वस्तूंची खरेदी करावी, असे आवाहन नियोजन विभागाने केले आहे.