झाडे कोसळण्याच्या घटना टाळण्यासाठी वृक्षांची नियमित निगा राखा!

मुंबई, प्रतिनिधी :

झाडे आणि त्यांच्या फांद्या कोसळण्याच्या घटना रोखण्यासाठी मुंबईकरांनी आपल्या परिसरातील वृक्षांची नियमित देखभाल करावी, असे आवाहन बृहन्मुंबई महानगरपालिकेने नागरिक आणि गृहनिर्माण संस्थांना केले आहे. वाढते तापमान, हवामानातील बदल आणि पाण्याची कमतरता यांमुळे वृक्षांवर ताण येऊ शकतो. त्यामुळे झाडांना गरजेनुसार पाणी देण्यासोबतच धोकादायक झाडे आणि कमकुवत फांद्यांची वेळेत माहिती देणे आवश्यक आहे.
पिण्याच्या पाण्याऐवजी प्रक्रिया केलेल्या पाण्याला प्राधान्य
झाडांना पाणी देताना पिण्याच्या पाण्याचा वापर शक्यतो टाळावा. त्याऐवजी सांडपाणी प्रक्रिया प्रकल्पातून मिळणारे झाडांसाठी योग्य व सुरक्षित प्रक्रिया केलेले पुनर्वापरयोग्य पाणी वापरावे. पाण्याचा अपव्यय टाळून उपलब्ध पाण्याचे नियोजन करावे. गृहनिर्माण संस्थांनी आपल्या आवारातील झाडांची संख्या, त्यांची स्थिती आणि पाण्याची गरज लक्षात घेऊन नियमित पाणीपुरवठ्याचे नियोजन करावे, असे महापालिकेने म्हटले आहे.
झाडांवरील धोक्याची लक्षणे ओळखा
झाडे कोसळण्याच्या घटना टाळण्यासाठी केवळ पाणी देणे पुरेसे नाही, तर झाडांच्या आरोग्याची नियमित तपासणी करणेही गरजेचे आहे. झाडाचा बुंधा कमकुवत होणे, त्याला भेगा पडणे, झाड एका बाजूला झुकणे, मोठ्या फांद्या सुकणे किंवा मुळे उघडी पडणे ही संभाव्य धोक्याची लक्षणे आहेत.
अशी लक्षणे आढळल्यास नागरिकांनी दुर्लक्ष न करता संबंधित झाडाची माहिती तातडीने बृहन्मुंबई महानगरपालिकेला द्यावी. वेळेत देखभाल आणि आवश्यक कार्यवाही केल्यास संभाव्य दुर्घटना टाळण्यास मदत होईल, असे आवाहन महापालिकेने केले आहे.
शहरातील पर्यावरणाचा समतोल राखण्यासाठी, सावली आणि शुद्ध हवा मिळण्यासाठी वृक्षांचे संरक्षण महत्त्वाचे आहे. त्यामुळे नागरिक आणि गृहनिर्माण संस्थांनी वृक्षसंवर्धनासाठी सक्रिय सहभाग घ्यावा, असेही महापालिकेने स्पष्ट केले आहे.