मुंबईत कोविड बाधित एकही नवीन रुग्ण नाही
कोविड सदृश्य लक्षणे आढळल्यास योग्य काळजी घ्या - महानगरपालिकेचे आवाहन
प्रतिनिधी, मुंबई
२७ जून २०२५_
मुंबई महानगरात कोविड-१९ विषाणू बाधित एकही रुग्ण शुक्रवारी आढळलेला नाही. त्यामुळे मुंबईकरांसाठी तसेच मुंबई महानगराच्या आरोग्य व्यवस्थेसाठी ही दिलासादायक बाब ठरली आहे. असे असले तरी, सर्व नागरिकांनी कोविड सदृश्य अथवा तत्सम लक्षणे आढळल्यास योग्य ती काळजी घ्यावी. वैद्यकीय तज्ज्ञांच्या सल्ल्याने वेळीच उपचार घ्यावेत, असे बृहन्मुंबई महानगरपालिका प्रशासनाच्या वतीने आवाहन करण्यात आले ,आहे.
कोविड हा विषाणूजन्य आजार आहे. सद्यस्थितीत मुंबई शहर व उपनगरामध्ये अधूनमधून कोविड विषाणू संसर्ग बाधित रुग्ण मागील २ महिन्यांपासून आढळून येत आहे. तसेच महाराष्ट्राच्या अनेक जिल्ह्यांमध्ये कोविड बाधित रुग्ण आढळून येतात. मुंबईमध्ये कोविडचे रुग्ण ‘पॉझिटिव्ह’ आल्यानंतर नियमित उपचार केले जात आहेत. मागील काही आठवड्यांपासून कोविड बाधित रुग्णसंख्येत आढळणारी घसरण आणि शुक्रवारची शून्य रुग्णनोंद ही मुंबईतील आरोग्य यंत्रणेसाठी आणि नागरिकांसाठी अत्यंत महत्त्वाची व सकारात्मक बाब ठरली आहे.
● जानेवारी ते एप्रिल २०२५ पर्यंत ६ रुग्ण,
● मे मध्ये ४३५ रुग्ण
● जून मध्ये ५३९ रुग्ण याप्रमाणे नोंद झाली आहे. (पैकी फक्त ६२ रुग्ण सक्रिय आहेत. त्यांना अतिसौम्य लक्षणे आहेत.)
*जून महिन्यातील साप्ताहिक रुग्णसंख्येचा तपशील:*
● पहिला आठवडा (दिनांक २ ते ८ जून): २०२ रुग्ण
● दुसरा आठवडा (दिनांक ९ ते १५ जून): १८६ रुग्ण
● तिसरा आठवडा (दिनांक १६ ते २२ जून): ९९ रुग्ण
● चौथा आठवडा (दिनांक २३ ते २९ जून): ३० रुग्ण
*‘व्होल जीनोम सिक्वेन्सिंग’ – (Whole Genome Sequencing – WGS)*
बृहन्मुंबई महानगरपालिकेतर्फे ‘जीनोम सिक्वेन्सिंग’ करिता पाठविण्यात आलेल्या १९ कोविड नमुन्यांच्या तपासणी अहवालानुसार, मुंबईत अद्याप कोणताही नवीन किंवा चिंताजनक विषाणू प्रकार (Variant of Concern) आढळून आलेला नाही.
इन्फ्लुएंजा सदृश (ILI ) व श्वसनाचा तीव्र संसर्ग / दाह असलेले रुग्ण (SARI) तसेच कोविड सदृश लक्षणे आढळल्यास त्वरित महानगरपालिका दवाखाना, रुग्णालय किंवा कुटुंबाचे वैद्यकीय तज्ज्ञ (फॅमिली डॉक्टर) यांचा कृपया सल्ला घ्यावा.
योग्य काळजी घेतल्यास कोविड-१९ आजाराला प्रतिबंध करता येऊ शकतो. विशेषतः गंभीर आजार तसेच कमी प्रतिकार शक्ती असलेले रुग्ण जसे की, कर्करोग (कॅन्सर), वृद्ध नागरिक, मधुमेह, उच्च रक्तदाब, किडनी आजार असलेले रुग्ण यांनी योग्य ती खबरदारी घ्यावी.
*कोविड-१९ चा प्रतिबंध करण्यासाठी नागरिकांना आवाहन-*
● खोकताना योग्य ती सावधगिरी (Cough etiquette) राखणे.
● साबण आणि पाण्याने वारंवार हात धुणे.
● योग्य आहार व आराम करणे
